أحدث مواقف لديرتي واهلها ....

**ابويزيد** · #1 07-01-2003, 12:59

أكثر الأشياء اللي تضيق صدري و تجيب لي الغلقة و تخلي الدنيا مقفله معي .. هي المقارنة بين مجتمعنا و مجتمع ثاني ..

من جد و الله يا جماعة !!

يعني لو أجلس أفكر في الفرق بينا و بين مجتمع ثاني و أنا مشغل الراديو كان يطق علينا أبو الجيران و يقول لنا ترى خزان الموية حقكم يهرب .. >=== أقول الله من خفة الدم .. كمل بس :

من جد يا جماعة يجيني إحباط يخليني أفكر أهاجر لبلد ثاني ، و ما يردني إلا حبي لأهلي ..>== الله من زود الولاء للوطن

أكيد كثير منك يتساءلون ويقولون وش جاه ذا أستشاط علينا و لا عاد صار يحب ديرته !!

و أنا أقول هذا مهوب شي طارئ .. هذا وليد تراكمات خمس وعشرين سنة عشتها في ذا البلد .. من دحدرت من بطن أمي و أنا متعقدن من ذا الديرة !!

عندك الجو مثلا .. قارن جونا مع جو أي دولة ثانية .. منتب لاقي مثل من جونا .. لو تطلع يدك مع دريشة بيتكم تعفطت أصابعك من زود الحرارة .. لكن مهوب هذا اللي قاهرني .. اللي قاهرني صدق هم ذا المبزرة اللي يدورون بسيارتهم الساعة ثنتين في عز القيظ .. ودي أعرف بس وش اللي حادهم على الدوران !!

عندك سواقة بعض الناس .. من تركب السيارة و أنت على أعصابك .. كنك في رالي .. مصاقط و هواش و محاد .. لدرجة أني كلما شريت لي سي دي سيارات حق البلايستيشن خلصته في وقتها من زود ما أنا متعود على المحاد و المصاقط .. صرت بدال ما أسابق بالكمبيوتر أروح أدور في الشوارع ؟؟؟؟؟؟

اما نفسيات بعض الناس الله ياساتر .. تدخل عليه تلقاه مكشر و نفسه في طرف خشمه .. تبادره بالسلام يا لله يرد عليك .. كنك تشحذه سلام ، زين بعد إذا ما قال الله يعطينا و يعطيك .. أما إذا صار له عندك حاجة جاك فاتح كشرته من بعد كيلو .. و يقعد يدعي لك بالخير ساعة .. يعني عالم مصلحجية إلى اللعلعة !!

تقعد مع أخوياك على طعس و إلا في روضه إذا جا الربيع ، و تقعد على الثيل و أعصابك عال العال .. و إذا شفت عصفور و قلت لهم ياسلاااام يازين منظر العصافير مع الروض و الطعس و السما الصافية فعلا تمازج رائع .. قالو لك هها بس بلا هبال عطنا الساكتون خل نرجده .. و تلقاهم يطامرون يوم كامل ورا عصفور كبر أصبعي الصغير و إذا حالفهم الحظ و صادوه .. شبو لك نار كبر بليس ثمن شووه .. ثمن يطبون عليه تسعطعشر واحد .. و أخر شي إذا فصفصوا عظامه قالوا لك ياشين لحمته شيناه !!

تطلع من المسجد تلقا شايبين يبحلقون فيك و أنت ماشي .. تمر مع جنبهم وتسلم .. يشكلون لك و يستمرون في البحلقة فيك .. تمشي و تخليهم .. لكن واحد منهم يقول لك يا ولد .. تقوله سم يا عم .. يقول مهوب أنت ولد فلان بن فلان .. تقوله لا .. يقولك إلا نفس السحنه .. تاخذه على قد عقله و تقوله طيب أنا ولده .. ينقز لك الثاني و يقول بلا تسذب فلان بن فلان ما يجيه عيال !!

تروح للسوق أنت و أمك .. تغفل عنها خمس دقايق ثمن ترجع لها .. تلقا بزر ما تقدر تشوفه إلا بمكبر قاعدن يغازل أمك .. ودك تجلده .. لكنك تخاف ينقطم و يتكسر في يدك .. فتقوله عيب يا بابا اللي تسويه .. فيقولك : ألعب غيرها ، أنا حاجز البنت قبلك !! .. تسطره و تلزقه في الجدار فيستادب من ملاحق الحريم و يحول على ملاحق لبناني كبر أبوه !!!

تقعد في الاستراحة مع الشباب .. اللي يلعب بلوت و اللي يناظر الدش و اللي يحرحر في شيشته و اللي يتشكى من حرمته .. أما أنت فقاعد مع واحد في زاوية الغرفة لا لكم و لا عليكم قاعدين تناقشون في مستقبل العلاقات السعودية العراقية .. و فجأة يسكتون كلهم ثمن يكرونها ضحك عليكم .. و يبدون يعلقون .. اللي يقول " ياشين الفلسفة على البقر " و اللي يقول " وش خليتو لكوفي عنان ، حرام عليكم خلوه يشتغل "

ترجع لبيتكم في عز الليول تافلن العافية ، تدور الفراش دورة .. تدخل غرفتك تلقى برران أخواتك متسدحين على سريرك و نايمين .. تجي تبي تطلعهم برا غرفتك .. تطلع لك أمك من بين الظلام و تقولك " وجع ماعندك قلب ، خلهم ينامون في سريرك ذا الليلة " تقول لها " و أنا وين أنام فيه !! " تقول " هين أنت كبير و تجسر رح نم في الملحق " تروح تنام في الملحق و ما يجي عقب ثلاث ساعات إلا و بزارين أختك يرادون فوق ظهرك .. تقوم تجلدهم .. تطلع لك أمهم و تقول " هو وش فيك عليهم " .. تقولها ذبحوني ما خلوني أنام .. تقولك مالهم دخل المساكين أنا اللي قايلة لهم يقومونك من النوم عشان توديني لبيتي !! .. عاد وقتها ودك تجلد أمهم بكبرها !!

تفتح التلفزيون يطلع لك برنامج عن المدارس .. و يقولك أن طلاب مدرسة في فرنسا تمكنوا من إعادة تركيب مسبار مصغر .. و طلاب في مدرسة كندية تمكنوا من استخلاص الكلور من ملح الطعام .. و طلاب في مدرسة بلجيكية تمكنوا من تقييم مستوى التلوث في بروكسل و طلعوا بنتايج قريبة من اللي توصلت لها وزارة البيئة عندهم .. و عقبها أقعد أفكر يومنا في المدرسة وش أزين تجربة سويناها .. و أطلع بنتيجة أننا ما سوينا إلا تجربة وحده وهي أن الموية في علبة زبادي إذا صبيتها في إناء مسطح تطلع نفس الحجم !! .. و اللي قاهرني أننا يالله فهمنا ذا التجربة !!!

في أمريكا صحفي مدري وش أسمه محسرن ببوش و فاضحه في كل محل ، وفي فرنسا عمدة باريس مستقعدن لشيراك و قايل له ألا ياللي مخليك رئيس في الإنتخابات الجاية ، و في ألمانيا مسحبين قيرهارد شرودر مع أذانه للمحكمة عشان يشهد في قضية متورطن فيها خوين له ، و مرة أشتكى رئيس وزراء أسبانيا " أزنار " من أرتفاع أجور لاعبين كرة القدم فقال مدرب نادي برشلونه مع أنه هولندي و أنت وش دخل أهلك في الموضوع ، وفي السويد قد صقعوا الشرطة وزير التجارة عندهم بمخالفة سرعة ، و في بريطانيا كلمت الشرطة على توني بلير وقالوا له ترانا ماسكين ولدك سكران وهالمرة سماح لكن المرة الجاية نبي نلعن أبو خامسه !! و ياكثر القصص اللي من هالنمونة ، أما عندنا فتقول يالله السلامة عسى مايجينا مخالفة !!!!

لكن يا جماعة أنا ما أتحمل أفارق ذا الديرة أكثر من أسبوعين ، أسبوعين بالكثير و أشتاق لأهلها و بثارتهم و لجوها و حرارته و للناس و سواقتهم ، و الله أني إذا جيت من السفر حول ما أحب راس " فاروق " راعي البقالة اللي جنب بيتنا .. من زود حبي و شوقي لها الديرة ..

من طرف آخر.....

تحياتي .... ابويزيد

**اتنفس حبك** · #2 08-01-2003, 06:42

[ALIGN=CENTER]

ابو يزيد

تبي الصج

موضوعك يعور القلب

المقارنة فيه قلبت من الاواجع الكثير

بس تظل بلد الانسان عزيزه على قلبه
مهما كان فيها من عيوب ونواقص

ودوم اقول لاهلي اني اشتااااق لبلادي

اشتاق لكل شي فيها
شينها قبل زينها

شوارعها الحصى قبل المرصوفه

سكيكها وفرجانها الضيقه

قبل الحديثه الواسعه

حتى ناسها الشينه قبل الطيبه

كل شي

مر وحلو فيها

يعطيك العافيه يا بو يزيد[/ALIGN]

**الساهر** · #3 08-01-2003, 15:09

اممم موضوع حلو ياخوي

تسلم ايدك على اختياره

واذا ماني بغلطان فترى من فواصل مختارنه