كنت نايم .. ( آخر الأخبار ) .. !!

**ابويزيد** · #1 01-03-2003, 14:52

كنت نايم.. وبعالم الأحلام هايم..
مادري في شو كنت أحلم
مره احس اني اسوق سياره..
ومره اقول كنت مضيف طياره.. :)

كان الجو بارد..
وكنت متغطي وشارد..

رن التلفون
وقلت ياترى من يكون؟؟
هذا المزعج هل هو صديق ولا مزيون..
هل هو عاقل ولا مجنون؟؟

رديت عليه وانا كلي شك وظنون!!
وبـرقه بعد ماكنت عصبي انا انسان حنون..

سمعت صوت ماتوقعته.. :
ولا في خيالي تخيلته..
ولا حتى بحلمي سمعته..

بنت..

قلت هلا
وقالت اهلين..
نوره موجوده؟؟

قلت وأنا صوتي رايح فيها..
لحظه شوي بناديها..
ويلست أصوت واقول نوره .. يامن نوره يلاقيها..
ورديت للسماعه وقلت مادري وين راحت الله يهديها..

بس دقيقة ماعندنا نوره!!
وبادر البنت خوف!!
قالت آسفه غلطانه..
قلت ولا يهمك عادي لا تكونين زعلانه؟؟
مايهم اذا ماعندنا بالاسم فلانه..

وقالت شكلك كنت نايم..
قلت لا.. توني قايم..
قالت تدرس ؟؟

قلت الدراسه خلاص باح..
انتي شكلك تدرسين؟؟
كيف اختباراتك ؟؟ عسى أنكم مرتاحين..
قالت باقي لنا ونخلص يومين
وخايفه والله من مادتين..

قلت من الاختبارات لآ تخافين..
دامك الليل تذاكرين..
وعلى الله تعتمدين..
واللي يزرع جح ما يحصد يقطين..

أهم شي انك ماتنسين..
قبل الاختبار الله تدعين..
ومن إبليس تتعوذين..
خلقه من نار وخلقنا من طين..

وقعدنا نسولف في أمور..
من شو اسمك الين غلاء المهور..

قالت اسمي (ود) وقلت لها انا احمد..
وقالت صدفه غريبه اسامينا فيها دال..
تصدق كنت اتمنى يسموني نوال!!
تصدقين وانا كنت اتمنى يسموني جمال

ويلسنا نسولف في بحور الشعر والموال..
وماهمنا كلام الناس والعذال..
وفجاءة خلصت السوالف ولا لقينا اللي ينقال؟؟
وسكتنا..

وبدلع..قالت أنت تشجع الوحده؟؟
قلت في قلبي.. مادري أجاوبك بكف ولا بنعال..
بالله عليك هذا سؤال؟؟ :19m

قلت أنا شعباوي.. وما يهمني القيل والقال..
هذا الكوماندوز هذا حبه طاح في القلب ولا ينشال..
والشمس مايغطيها مشخال..

قالت شمعنى الشعب !!..
قلت يا بنت.. الشعب فن ولعب ويفوز باللي حضر..
وجمهوره له كلمة وامر..
يابنت..لا تغريني بالكثير..
لو تضربين مليون بصفر تساوي صفر..

و حتشرنا وشبينا.. بس بسرعه انطفينا..
الظاهر بعضنا هوينا..
وبدرب الحب ابتدينا..

قالت.. احمد..
قلت آمري يا ود..
قالت اوصف لي شكلك..

هذا وين توهقنا..
شوفي العرب لونهم واحد
ولسانهم واحد.. واحلف بالله ولا غيره أحد
أني مب طويل ولا قصير..
شعري ناعم مثل الحرير..

قالت والعيون..
قلت العيون شبرين في ثلاثه اشبار
قالت اسد..
قلت شكرا يا احلى شهد

المهم ان تواعدنا..
والموعد باكر في المول قررنا..
بين خوف وامل تواعدنا..

وقضيت ليلتي في حيرة..

وش البس؟؟ جنز ولا كندوره والله حيرة..
مافي غيرها يفك الحيرة.. شيشه و تعميرة..
ورجعت للبيت اعاتب امسي وابتسم لغدي..

وبصعوبة نمت.. قعدت اتقلب وون..
يا قلبي قلي شو اللي من الحب اهون؟؟
غريبه هالدنيا غريبة..

وراحت ليلتي.. وزادت بلوتي..
اليوم موعدي.. انا والحب بنلتقي..

وكشخت :love99
لبست فوق راسي غترتي..
في مكان اللقاء تغيرت حتى خطوتي..
صرت ارتجف واترنح بمشيتي..
كائني انساق للموت وهاذي نهايتي..

مب سوالف شجاعة.. هذي اكبر بطولاتي..
ايذا خسرت بتضيع احلى امنياتي..
يلست ادور والف وحول المكان اطوف..
وين هذيك العين اللي عليها قلبي ملهوف..
ود ؟؟ ياليت الناس تجيي وتشوف..

وفجاءة..

وصلني مسج..
يقول..
سويتها فيك يا احمد..
رد بيتكم وخل عنك هالسوالف ياتـعبان

روح نام ..
تعيش وتاكل غيرها
و سويتها فيك ..
:19m:19m:19m

:المرسل

الوالدة

**سفيرة الأحزان** · #2 01-03-2003, 21:55

[ALIGN=CENTER]ابويزيد ..
حركه حلوه منك ..
بس حبيت أسأل هذه من واقعك أو من خيالك ..[/ALIGN]

**دموع العين** · #3 01-03-2003, 22:08

شو السالفه؟؟؟؟؟؟؟؟؟؟

**أبو خلود** · #4 02-03-2003, 06:07

[ALIGN=CENTER]

هههههههههههه

المسكين طاح وجهه

:):):)

[/ALIGN]

**ابويزيد** · #5 02-03-2003, 10:12

اختي سفيرةالأحزان ..

الله يهديك :

هل انتي صادقه في سؤالك عن ان هذا من واقعي ,,

انا لست من تلك الفئه من الناس ..

وانما هي حكايه تعبر عن واقع الشباب المساكين ..

الواحد منهم ما يصدق وحده تتصل بالغلط عليه ..

كأنه اول مره يشوف او يسمع صوت ناعم ..

تحياتي ... ابويزيد

**اتنفس حبك** · #6 02-03-2003, 13:54

[ALIGN=CENTER]

ليش تستحي يا بو يزيد

ندري انك غشيم بهالسوالف
والا كان ما خدعتك الوالده

عموما تعيش وتاكل غيرها:)

احمد شكرا على نقل الموضوع

اوه

اسفه قصدي ابو يزيد

[/ALIGN]

**ابويزيد** · #7 02-03-2003, 15:02

ياجماعه خلوا عنكم هالسوالف ..

يعني هذا جزاي اللي قاعد احرك مجلسكم ..

وقاعد اكتب فيه ومخلي المجلس العام ..

واخرتها كذا ..

المره الثانية بتشوفون ..

وش تكون المشاركه .. :nict

بس لاحد يزعل ..

تحياتي للجميع ..

ابويزيد ...

**اتنفس حبك** · #8 02-03-2003, 15:33

[ALIGN=CENTER]

المجلس واهله

من اوله الى اخره كله لك

صدرنا ووووووووووسيع

حط اللي بخاطرك

ما نزعل

يا الزعول

[/ALIGN]

**أبو خلود** · #9 03-03-2003, 13:20

[ALIGN=CENTER]

حنا بإنتظارك

يا أبو يزيد

ومثل ما قالت أتنفس حبك

اقتباس:

المجلس واهله

من اوله الى اخره كله لك

صدرنا ووووووووووسيع

حط اللي بخاطرك

ما نزعل

بس لا تطول

يا زعلان:19m[/ALIGN]

**ابويزيد** · #10 03-03-2003, 14:43

[ALIGN=CENTER]السلام عليكم[/ALIGN]
[COLOR=limeg
هلا وغلا بالغالي ..

ابوخلود 1/ صفر عليك ..

وش اللي جابك معهم بعد ..

ما اقول إلا ترقب اسمك ضمن قائمة اللي حشيناهم ..

في برنامج البادية .. ( اشو .. فكه .. اسمي ماهو معهم .. )

كل التحية اخوي ..

ابويزيد...[/ALIGN]

**دمعة أمل** · #11 03-03-2003, 15:17

والله الموضوع حلو والقصه أحلى بس النهايه هههههههههههههه
أحلى وتعيش وتاكل غيرهاههههههههههههههه

برحب بيكم بأول رد أضعه بين أيديكم وأنشاء الله ما يكون الاخير

**دموع العين** · #12 03-03-2003, 15:29

الصراحه الموضوع ماينفهم متلخبط على بعض

السموحع بو يزيد عن الزعل بس

**بوربيعة** · #13 03-03-2003, 17:51

تسلم ابوزيد على المشاركة الحلوة منك

وتعيش وتاكل غيرها

تحيااتي لك