أهلاً رمضان

**عثمان العبدالله** · #1 14-10-2004, 23:29

السلام عليكم
وأسعد الله أوقاتكم بكل الخيرات
ابارك لكم الشهر الكريم وفقنا الله جميعاً
الى صيامه وقيامه ، وتقبل من الجميع صالح الأعمال
وكل عام وأنتم بخير

[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
هلا بك ضيفنا الغالي .. هلا والفين ترحيبه = نهلّي بك من قلوبٍ على لقياك مسروره
اذا كان الكرم طبع العرب والكل يدري به= اجل وشلون لو يدرون ضيفٍ جايب خيوره
امرنا الله باكرامه ولا نهمل مواجيبه = وخصّه بالفضل من بين باقي العام وشهوره
فرض فيه الصيام وسهّل المولى مطاليبه = وانزل فيه خير الذكر للإنسان دستوره
بليله كالفجر طالع على أوّل تراحيبه = حباها الله بالإيمان نورٍ شعّ من نوره
بها ينزل ينادي وين من يدعي وانا اجيبه= الا وينك ياعبدالله تلبي دعوة حضوره
ترى طوّلت بالصدّه ولا تنفعك هالغيبه = خذاك الوقت بدروبه ولا حسّيت بخطوره
تأمل وضعك الخاطي عسى يمديك ترتيبه = بفعل الخير ما تضمن تعيش وتلحق لدوره
فلا تغترّ في وقتٍ خدع غيرك بالاعيبه= رحل ماله رصيدٍ ينفعه والصحف منشوره
مدام إن العمل يقبل فبادر قبل تغريبه = الى دنيا حساب ولا عمل والخلق محشوره
تقرّب للذي ما صكّ في يومٍ مجابيبه = قريب منك لو ناديت في قيعان مهجوره
فرب النفس بالطاعه بفعلٍ ما تماري به= تبي من ربك القبلان ترجي ذنوب مغفوره
وتعلّم كيف تقنع في حياتك تكسب الهيبه= فلا تحتاج في يومٍ لشخصٍ تدري غروره
وتعلّم حب اخوانٍ على دينك بلا غيبه = ولا مجامل على باطل يهدم الحق وقصوره
ومادام إن الشهر ضيفك ومثلك من معازيبه= عليك بفعل تشكر به ولاتنقد على قصوره
تصوم صيام متعبّد يبي من ربه يثيبه = تهجد في توالي الليل في لحظات محضوره
وتسلّي النفس بالقرآن ..تأمل في اساليبه = وتمعن في تفاسيره ولا تستعجل سطوره
يزيدك عمق بالإيمان بربٍّ عالم لغيبه = ويعطيك المناعه في زمانٍ كثرت شروره
الا يا صاحبي اصحى كفاك النوم والسيبه= فعمرك راح ما حسّيت ولا فكّرت بمروره
تشيل هموم تتضايق وتحزن لاتفه مصيبه= تبي الراحه ولاتدري علام النفس مقهوره
لأنك ما قربت لخالقك من نفسٍ منيبه= تصلي في خشوع الزاهد اللي ركّز شعوره
يناجي سامع النجوى ويبكي في محاريبه = يبي حسن الختام وجنةٍ بالعدل معموره
ترك دنياه ما غرّته لو طابت مشاريبه = يعرف إنّه ولو طال العمر راحل بلا شوره
كذا ترتاح في دنياك بقلبٍ زان تهذيبه= وتشعر كيف بالإيمان نفسك دوم مسروره[/poem]

**الحالمة** · #2 14-10-2004, 23:44

تسلم أخوي عثمان العبدالله
على هذي المشاركة الرووووعة
كلامك رائع..وحسك فيها أروع
وأقولك كل عام يا خوي وأنت إلى الله أقرب
وأن انشاء الله ينعاد عليك رمضان وانت بألف صحة وعافية
وعسى انكون من أهل الجنة ..آمين ..
تحيات ..الحالمة..لك يا خوي:)

**العقيدي** · #3 16-10-2004, 08:57

عثمان العبدالله
تسلم يا شاعرنا على هذا النظم الجزل
وكل عام وأنتم بخير

**نــور** · #4 16-10-2004, 13:34

كل عام و الجميع بخير ، تقبل الله منا و منكم و من المسلمين جميعاً الصيام

**ظامي الروح** · #5 18-10-2004, 00:32

الطائر المهاجر

شاعر العثمانيات

كعادتك ،، تحلق في سماء الابداع

لتغرد شعرا نستمتع به

أبيات حملت ارشادات و نصائح عظيمة

صح الله لسانك مليون و لا هنت

تقبل تحياتي

ظامي الروح