سؤال لكل من جرب سيارات بي إم دبليو

**نجر** · #1 28-01-2008, 10:32

السلام عليكم.
أخطط لشراء سيارة جديدة،
حاليا أستخدم مرسيدس بنز إي كلاس
واهي جدا ممتازة من نواح كثيرة.

حبيت البي أم دبليو، ولكن هناك من حذرني بخصوص الإعتمادية على مثل هذه السيارات
قالوا أن البي إم سيارة كثيرة الأعطال.
عموما هذه فرصة أسأل إذا أحد مجرب البي إم لفترة كافيةويقدر يخبرني عن مدى الإعتمادية على هذه السيارات.

شاكر لكم.

**زهير ابراهيم** · #2 02-02-2008, 22:10

**ظبيانية** · #3 03-02-2008, 09:38

هلا و غلا نجر

و الله انا مثلك ودي اطلع سيارة و صار لي شهور ادور في محلات السيارات و حايرة شو اختار

بالنسبة للبي ام دبليو اللي اعرفه انه سيارة عالية من درجة التقنية و هذا اللي يخلي الكراجات العادية ما تعرف تتعامل معاها و عشان كذا لازم اي عطل فيها تصلحه في الوكالة

الحين في الامارات مثلا يعطونك ضمان و صيانه مجانية لمدة خمس سنوات ( يعني ما تحاتي اعطالها لمدة خمس سنين ) بس بعدها الله اعلم

ربيعة اختي كان عندها X3 , وتقول مرة كانت حاطة معطر للسيارة و انكب شوي على شاشة السيارة و اختربت على طول

بس صراحة كشكل و فخامة وايد فخمة خاصة ال X5 الجديدة صدق جميلة

زين بسألك بالنسبة للمرسيدس ال E كلاس اي موديل عندك ؟؟

لاني فكرت فيها كسيارة و عندنا في بوظبي مسوين عرض حلو بس اللي رادني انه شكلها بتغير عقب سنة و نص

**زهير ابراهيم** · #4 04-02-2008, 07:38

**الساهر** · #5 05-02-2008, 18:13

اخوي يعتمد على شو راح تستخدمها مثلا

اذا مدينه وطلعات قصيره ترى زينه بس اذا بتروح فيها خطوط طويله ماتنفع

**ملكة دبي** · #6 11-02-2008, 20:52

اخوي تنفع وتوكل على الله يكفي وانت تسوقها ماتحس فيها

صح انا معاك انا بعد كنت اسمع ان السياره فيها مشاكل واكثر شي ال اكس فايف الجديم بس ها قبل

توكل توكل

ويكفي دلع البي ام

**الساهر** · #7 18-02-2008, 02:25

تبي نصيحتي خذت لكزس فئه الجي اس او ال اس

انا جربتها لمده سنه كامله ولله الحمد لا اعطال ولا هم يحزنون اهم شي يكون بترول في السياره وبس

**نجر** · #8 18-02-2008, 13:08

شاكر لكم جميعاً على أرائكم واللي للأسف مانتبهت لوجودها إلا بعد ما أخذت سيارتي الجديدة :)

عملت دراسه لمسح جي دي باور السنوي ووجدت إن اللكزس هي أفضل خيار.
عن كل 15 سيارة بي إم دبليو ومرسيدس وأودي تتعطل لكزس واحده فقط !

أخذت لكزس جي إس 430 أحسها جميله من ناحية الشكل وإعتمادية تويوتا ماعليها كلام.

أختي ظبيانيه
كلامك صحيح عن البي إم دبليو .. السيارة تعتمد على حساسات مايكرو في كل شيء.. ,إذا تعطل عندك شيء صغير بيعمل خلل في "السينكرونايزيشن" بين الكومبيوتر والأجهزة الثانية -ماعرفت أترجمها بالعربي-
العرض اللي تقولينه "ضمان خمس سنوات شامل الصيانه "وقطع الغيار الإستهلاكية و غيار الزيت" عرض جيد!
كنت أفكر آخذ وحده من الفئة الخامسة لكن للأسف أحس البي إم دبليو مثل السم في العسل !!

المرسيدس اللي معي هي 2003 E320 Sedan مستورد
أنا علاقتي بالمرسيدس عاطفيه أكثر من كونها إستهلاكيه. رائحة المرسيدس ماتتغير مع مرور السنوات.
يعني أشم نفس الرائحة اللي كنت أشمها في سيارة أبوي المرسيدس اللي كانت معاه يوم كنت صغير :)
كانت حلوه كثير إلى أن عملت عليها حادث مؤلم قبل فترة، من بعد الحادث حسيتها مو متماسكه زي قبل.
ماعندي فكره عن موديله الجديد بس إذا بتاخذينه سيكند هاند لاتاخذين موديل أقدم من 2007
لأن الموديلات الأقدم فيها هفوات مصنعيه.

أخوي الساهر كثير قالوا نفس كلامك، الصراحه إني راعي خطوط . الرياض - بو ظبي - الكويت
هذي أمثله على المشاوير :) أحب أستخدم السيارة إذا كنت مسافر ومو مستعجل.
قفلت موضوع البي إم دبليو نهائيا! وأخذت بنصيحتك عفويا أخوي واخذت لكزسGS430 وكثير كثير كثير حلوه شكلاً وقلباً
إذا قارنتها بالسيارات الألمانيه اللي تنافسها.

أختي ملكة دبي شاكر لك رأيك بس للأسف اخذت لكزس على البي إم دبليو.
أنا لاحظت إني أشوف سيارات اللكزس القديمه كثير في شوارعنا لما تقارنينها بمثيلاتها من البي إم دبليو
وبعدين أنتي بنوته، والبنات يدينهم خفيفه على السيارات، أنا أحب أعبي بترول وأدق سلف !
والله يهنيك بسيارتك ويكفيك شرها.

**الساهر** · #9 18-02-2008, 14:22

بالبركه اخوي الله يعطيك خيرها ويكفيك شرها يارب

انا مجرب الجي اس 300 لمده سنه وممتازه الحين ناوي اعطيها اخوي خذت لاندكروزر 2008

سؤال خذتها بكم لان في فرق كبير بالسعر بين الوكيل في ابوظبي والوكيل اللي بالبريمي

نقطه اخرى اذا جيت بوظبي نريد عزومة السياره الجديده

**ظبيانية** · #10 18-02-2008, 14:40

ما شاء الله مبروووووووووووك السيارة خوي نجر

شرينا لوالدتي نفس سيارتك GS430 ورائعة الصراحة

بس حليلها الوالدة مو متعودة على التكنولجيا الجديدة في السيارات بس صايرة تتعود عليها شوي شوي

الساهر مبروووووووووووووك الكروزر ما شاء الله الموديل الجديد 2008 خطير

نجر و الساهر الله يعطيكم خيرها و يكفيكم شرها

و لا تنسون ربط حزام الامان و التوكل على الله العلي القدير

و قيادة ممتعة

الحين باقي لي انا اشتري سيارة بنوتية حلوة و الله يعينا نختار سيارة زينة

**نجر** · #11 18-02-2008, 15:29

عالبركه أخوي الساهر اللاندكروزر والله يعطيك خيره ويكفيك شره. جعلك غني .. ابشر أول مانجي لأبوظبي أبعطيك لفه :) وأفرش لك المفطح !
اللكزس جي إس 430 "V8" لونه كحلي متاليك أخذته بـ216 ألف ريال من "عبداللطيف جميل"

ظبيانيه اللكزس كثير حلوة والحقيقه إني وجدت فيها عيب واحد فقط مقارنة بالمرسيدس:
اللكزس الـ GS شوي ضيقه من داخل مع إن السيارة حجمها من الخارج كبير.
الحقيقه ما عمري شفت سيدة كبيرة مثل والدتك تسوق هالموديل، لكن يمكن لأني في السعوديه والنساء غير مسموح لهم بالقياده حتى الآن، غير إني متعود أشوف السيدات الكبار يمتلكون هالسيارات الحوتيه الضخمه :)
الله يحفظ والدتك.

إذا شيء "بنوتي" خذي لك مثل هذول :) :) :

والله الموفق

**ظبيانية** · #12 18-02-2008, 15:57

شكرا لك نجر و يحفظ لك والديك

الوالدة شباب بعدها ( ع فكرة هي اللي اختارت السيارة و اصرت عليها ) :) خذت لون اسود رويال

اقول نبي عزيمتين وحدة من الساهر ووحدة من نجر

و مبروك عليكم مرة اخرى :)